ന്യൂഡല്ഹി: ഭാരതത്തിന്റെ ദേശീയ ക്രിക്കറ്റ് ടീമിനെ 'ടീം ഇന്ത്യ' എന്ന് വിളിക്കുന്നത് തടയണമെന്നും പേര് മാറ്റണമെന്നും ആവശ്യപ്പെട്ട് സമര്പ്പിച്ച ഹര്ജി സുപ്രീം കോടതി തള്ളി. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് ഹര്ജി പരിഗണിച്ചത്. ഇത്തരം അനാവശ്യ ഹര്ജികള് നല്കി കോടതിയുടെ സമയം കളയരുതെന്ന് കോടതി ഹര്ജിക്കാരന് മുന്നറിയിപ്പ് നല്കി.
ബിസിസിഐ ഒരു സ്വകാര്യ സംഘടനയാണെന്നും അത് സര്ക്കാരിന്റെ ഔദ്യോഗിക പ്രതിനിധിയല്ലെന്നുമാണ് ഹര്ജിയില് പറഞ്ഞിരുന്നത്. അതിനാല് ബിസിസിഐ തിരഞ്ഞെടുക്കുന്ന ടീമിനെ 'ടീം ഇന്ത്യ' എന്ന് വിളിക്കുന്നത് പൊതുജനങ്ങളെ തെറ്റിദ്ധരിപ്പിക്കുമെന്നും ദേശീയ ചിഹ്നങ്ങള് ഉപയോഗിക്കുന്നത് നിയമവിരുദ്ധമാണെന്നും ഹര്ജിക്കാരന് വാദിച്ചു.
'ലോകമെമ്പാടും കളിച്ച് ഇന്ത്യയെ പ്രതിനിധീകരിക്കുന്ന ടീം ഇന്ത്യയെ പ്രതിനിധീകരിക്കുന്നില്ല എന്ന് എങ്ങനെ പറയാനാകും?' എന്ന് കോടതി ചോദിച്ചു. ഗവണ്മെന്റ് അല്ലാത്ത ഏതെങ്കിലും സ്വകാര്യ ക്ലബ്ബാണ് ഈ പേര് ഉപയോഗിക്കുന്നതെങ്കില് സര്ക്കാരിന് പരാതി നല്കാമെന്നും എന്നാല് ഇത് തികച്ചും അനാവശ്യമായ വാദമാണെന്നും കോടതി നിരീക്ഷിച്ചു.
നേരത്തെ ഡല്ഹി ഹൈക്കോടതിയും ഈ ഹര്ജി തള്ളിയിരുന്നു. ഹൈക്കോടതി ഹര്ജിക്കാരന് പിഴ ചുമത്തേണ്ടതായിരുന്നുവെന്നും എങ്കില് സുപ്രീംകോടതി വരെ ഈ പരാതി എത്തില്ലായിരുന്നുവെന്നും ചീഫ് ജസ്റ്റിസ് അഭിപ്രായപ്പെട്ടു.ഹര്ജിക്കാരന് 10 ലക്ഷം രൂപ പിഴ ചുമത്താന് കോടതി ആദ്യം ആലോചിച്ചുവെങ്കിലും വക്കീലിന്റെ അഭ്യര്ത്ഥന പ്രകാരം പിഴ ഒഴിവാക്കി. എങ്കിലും ഇത്തരം ഹര്ജികള് ഭാവിയില് പ്രോത്സാഹിപ്പിക്കില്ലെന്ന് കോടതി വ്യക്തമാക്കി.
E-paper LOGIN
LOGIN
